Presentación do informe “Que segue agora? Actualización do estado dos expedientes de homologación en Psicoloxía en España”

O mércores 11 de setembro ás 19.30 h acollemos a presentación dun informe que vén incidir no racismo institucional e na grandísima dificultade que teñen persoas inmigrantes para homologar títulos universitarios obtidos no estranxeiro.

Que segue agora? Actualización do estado dos expedientes de homologación en psicoloxía en España. Este informe foi elaborado de xeito colaborativo entre o CEMDRI (Centro de Estudios sobre la Migración, Discriminación y Racismo Institucional), o Movemento de Psicólogas e Psicólogos Migrantes e o Frente Interprofesional Migrante (FIM).

Contaremos con Gabriela Frias Goytia, psicóloga boliviana afincada na Coruña, quen é a coordinadora do CEMDRI, e de José María Casas, psicólogo arxentino afincado en Tarragona, voceiro do Movemento de Psicólogas e Psicólogos Migrantes. Falaránnos da loita polas homologacións de títulos universitarios estranxeiros en España e especialmente abordarán o caso de psicoloxía.

Tamén falarán da importancia da loita colectiva que se leva a cabo dende hai anos ante as denuncias de diferentes colectivos de profesionais con títulos estranxeiros que a día de hoxe non poden exercer no territorio español.