A Agrupación Cultural Alexandre Bóveda presentaba en marzo de 2023 o traballo de Manuel Monge –mestre e sociólogo, preso político na ditadura e socio da nosa asociación– POLA ELIMINACIÓN DA SIMBOLOXÍA FRANQUISTA DA CORUÑA. PROPOSTA PARA UN PROGRAMA DE GOBERNO (eleccións municipais de 28 de maio de 2023).
Axuntamos ese traballo actualizado a xaneiro de 2026: 29 rúas, 21 retratos, 28 distincións honoríficas, 449 placas, escudos e monumentos, 14 símbolos franquistas dependentes do ministerio de Defensa e 4 centros de ensino.
A Coruña conserva 421 placas do Instituto Nacional da Vivenda (INV) con simboloxía franquista do xugo e as frechas en 131 rúas. Barcelona xa retirou 1.100 desas placas en cumprimento da Lei de Memoria Histórica.
Unha sentenza do Xulgado do Contencioso nº 1 de Palencia de 15 de abril de 2016 condenaba ao concello de Palencia (alcaldía do PP) a retirar no prazo de dous meses as placas do INV. A sentenza sinalaba que o concello debería pedir a retirada aos propietarios das propiedades privadas. O catálogo elaborado polo concello, en cumprimento da sentenza, sinalaba 239 placas. Unha sentenza do Tribunal Superior de Xustiza de Castela e León ratificaba a sentenza do xulgado de Palencia.
O concello de Paterna (Valencia) aprobaba por unanimidade (alcaldía do PP) a retirada de 350 placas do INV franquista en marzo de 2011. Despois dunha primeira fase da retirada de 200 placas, por iniciativa dos propietarios, operarios municipais acababan o traballo en 2016 con alcaldía do PSOE.
Ademais da retirada de elementos contrarios á memoria democrática, o informe recolle uns criterios para a eliminación da simboloxía franquista e corenta propostas relacionadas coa aplicación da Lei de Memoria Democrática de 2022: homenaxe e atención ás vítimas do franquismo, lugares da memoria, inclusión da ditadura e a represión no currículo escolar.
Se queres descargar o informe actualizado, podes facelo desde aquí:
Pola eliminación da simboloxía franquista da Coruña (Actualizado a 2026)