O luns 2 de marzo, ás 20.00 horas, terá lugar a presentación do libro de Manuel López Foxo A construción da nación desde o realismo político, publicado por Libros Lorref.
A obra compila artigos que nos achegan a figuras e momentos da historia do nacionalismo galego e do país, co exemplo luminoso do Partido Galeguista de Castelao e Bóveda como faro. “O libro –como di Xavier Campos no limiar– é un convite, mais tamén unha proposta. O país, sempre por diante. As mans, tendidas a xeitos ben diferentes de comprender e de sentir a nación que compartimos. O pasado puido ser diferente. Mais a nosa obriga, hoxe, é soñar o futuro. E traballarmos, no presente, para facelo realidade”.
Manuel López Foxo (Ortigueira, 1960) é articulista desde os dezaseis anos. Crítica literaria, xornalismo cultural e columna de opinión. Colaborou en diversos medios e publicou, entre outros, os seguintes libros: Sobre a poesía última de Manuel María (1976-1995), Prosas apaixonadas, O pracer de reler e Literatura e País. Foi coordinador xeral da Universidade Popular de Ortigueira, pola que pasaron as principais personalidades da cultura galega galega daquel momento e figuras como José Luís Sampedro.
O autor estará acompañado por Anxo Quintana, Mercedes Queixas e Dani Cao.
