O luns 13 de outubro, ás 20 horas, acolleremos un acto de memoria e resistencia centrado na historia de Galiza durante a Guerra Civil e a posguerra. Contaremos coa presenza dos autores Anxos García Fonte e Carlos Sardiña para presentar a súa novela gráfica, A morte nas fragas, e ao remate proxectarase a curtametraxe documental Os fíos da memoria.
A morte nas fragas, con guión de Anxos García Fonte e debuxos de Carlos Sardiña , é unha novela gráfica que narra a historia de violencia e resistencia na Galicia rural entre 1936 e finais da década de 1950. A obra artéllase a través de varias historias humanas entrelazadas, baseadas en relatos de transmisión oral , que amosan o impacto da represión fascista na vida cotiá do pobo.
A narración adopta unha perspectiva múltiple, dando voz a nenos, mulleres e persoas perseguidas polo réxime. Un trazo distintivo da obra é a mestura da realidade histórica coa mitoloxía tradicional galega; os seres do submundo (“a mourindade”) interactúan cos personaxes e asisten á decadencia da súa cultura ancestral fronte á explotación capitalista dos recursos naturais. O relato ten o seu corazón xeográfico nas Fragas do Eume.
Visualmente, é un traballo onde as imaxes a miúdo superan ás palabras, e os escasos diálogos reflicten fielmente as fontes orais que o inspiraron. A novela preséntase como un mosaico que reflicte a destrución da Galicia tradicional: as súas crenzas, a vida comunitaria e a lingua. É un retrato da traizón e o desastre ecolóxico, mais tamén unha lección de resistencia e un canto de esperanza.
Para completar o acto, proxectarase o documental Os fíos da memoria (27 min), producido por Son Radiofusión e realizado por Xarda Producións. A peza narra a investigación de Constantino Rico, un cidadán francés de orixe galega, para desvelar o misterio que sempre envolveu a historia do seu avó, Pedro Rico Rodeiro, e Teresa López para coñecer as circunstancias do seu tío Constantino López Marcos. A súa busca en arquivos e cemiterios acaba dando froitos grazas a unha testemuña atopada a través dun podcast, desvelando a crúa realidade da Guerra Civil e a posguerra na súa familia.
Anxos García Fonte (Pontedeume, 1964) é a guionista da novela. Doutora en Filoloxía galego-portuguesa, traballou como xornalista cultural e crítica literaria en diversos medios como Xornal de Galicia, Sermos Galicia, Radio Fene ou o Consello da Cultura Galega. En 2022 estreou a curtametraxe A rosa incandescente, da que é guionista e produtora.
Carlos Sardiña (Fene, 1971) é o debuxante da obra. Formado como deseñador gráfico e ilustrador, é o fundador da web de ilustracións personalizadas telodibujamos.com. É colaborador asiduo da editorial Son Radiofusión, ilustrando libros como Galicia acorda, Bóveda ou María Casares, eu son o océano.
DATOS DO EVENTO
Inscrición necesaria
