Dentro do Cineclub Bóveda, o venres 19 de xuño ás 19.30 h proxectamos A moza da cidade (F. W. Murnau, 1930).
Agochada ás veces polo inmenso prestixio e influencia de “Amencer” e “Tabú”, é imposíbel non recoñecer hoxe esta obra como unha das demostracións máis depuradas do talento do cineasta alemán. Cunha parella memorábel como protagonista, formada por Mary Duncan e Charles Farrell, o filme preserva unha absoluta modernidade grazas á súa sabia lixeireza, o seu irresistíbel alento romántico e unha beleza plástica raras veces vista nunha pantalla, servindo de obvia influencia para o Terrence Malick de “Días do ceo”.
A sesión contará coa presentación de Martin Pawley, crítico e programador para quen esta é a súa película favorita de toda a historia.
