O venres 30 de xaneiro, ás 19.30 h, na nosa sede, temos unha cita ineludible para celebrar o moito que nos une a CUAC FM. Este 2026 non é un ano calquera: nós cumprimos medio século e a emisora comunitaria da Coruña sopra 30 velas. Son moitos anos compartindo loitas, ondas e cultura, e querémolo celebrar con todas vós do mellor xeito posible: xuntándonos.
A nosa conexión vai moito máis alá das siglas; sabedes que nos encanta a radio e que cada martes levamos o noso Recendo ao 103.4 FM. Por iso, preparamos unha tarde para gozar e charlar sen présas. Empezaremos vendo o documental Nada que ver, un percorrido visual pola historia de CUAC, e despois abriremos unha conversa entre amigos. Estarán os compañeiros e compañeiras do programa, xente da directiva e da emisora para falar do que fomos, do que somos e de como seguir facendo cidade e cultura libre. Vaste perder este dobre aniversario?
