O mércores 22 de outubro, ás 19.30 h, teremos unha nova sesión do ciclo Pensando o Futuro. Será cunha palestra de Inês Gusman, profesora de Xeografía da USC e directora da Fundación Centro de Estudos Eurorrexionais Galiza–Norte de Portugal (CEER), que nos falará da fronteira á Eurorrexión: as pontes entre Galiza e Portugal.
A fronteira serviu ás ditaduras ibéricas para limitar os vínculos entre Galiza e Portugal, mais nas últimas décadas foi reconfigurándose como espazo de encontro, colaboración e construción de relacións transfronteirizas. Nesta sesión, Inês Gusman invítanos a repensar o significado da fronteira á luz do pasado común, das transformacións políticas recentes e dos retos de futuro dun territorio compartido: a Eurorrexión Galiza–Norte de Portugal.
