O xoves 14 de maio de 2026, ás 20:30 horas, ten lugar no Circo de Artesáns a asemblea aberta “Salvemos os frescos de Lugrís!”.
No baixo do número 25 da rúa dos Olmos da Coruña atópase o único conxunto muralístico dos que pintou Urbano Lugrís que conservamos íntegro. Un espazo sen parangón para a historia da arte galega creado polas 12 pinturas que Lugrís deixou na parede.
Dende que, en 2021, pechou o local de hostalaría que se atopaba nese baixo, os frescos esmorecen por culpa da ruína do edificio, as inclemencias do tempo, a acción de pombas e ratas e o desleixo das administracións locais e autonómicas.
Cada día que pasa a situación é máis crítica e por iso o colectivo In Nave Civitas e a asociación cultural O Mural convocan a toda a cidadanía interesada e aos colectivos sociais a unha asemblea aberta na que decidir o seguinte paso para solicitar a actuación urxente de Xunta e Concello. Unha intervención dirixida xa e dunha vez a salvar os frescos do Fornos e nos permitir, de novo, o acceso á beleza.
O 14 de maio de 2026, ás 20:30 horas no Circo de Artesáns, decidiremos, entre todas, o seguinte paso.
