O luns 4 de maio, ás 20:00 horas, a nosa sede acolle a presentación de Begoña ou o pracer da amizade, a nova obra de Beatriz Maceda publicada por Xerais. Nesta biografía novelada, catro voces míticas —Circe, Penélope, Morgana e Xenebra— reúnense para narrar a vida de Begoña Caamaño, desde a súa infancia en Vigo ata o seu papel clave na cultura galega contemporánea. Acompañando á autora estará a doutora pola USC Pilar García Negro.
Begoña Caamaño, xornalista, activista e escritora, loitou pola igualdade e a liberdade nunha Galicia en transformación, tecendo redes de amizade e compromiso. Este relato convídanos a descubrir o poder das mulleres que devolveron a voz ás esquecidas.
A autora, Beatriz Maceda, naceu e vive na Coruña, aínda que pasou parte da súa vida en Vilalba. Mestra de Educación Primaria e especialista en Lingua Inglesa, conta cunha dilatada traxectoria no ensino e na literatura. Tras publicar relatos en Tempos Dixital, deu o salto ao álbum ilustrado con títulos como Man. O alemán de Camelle (2012) ou O álbum de Garrincha (2015). Entre as súas obras destacan tamén Cando John Lennon coñeceu a Valle-Inclán (2017) e os seus traballos en Xerais: Lúa en Ningures (2019), As sentinelas do silencio (2022), Luísa Villalta. Alma de violino (2023) e Teranga (2024).
