O mércores 19 de febreiro, ás 19.30 h, teremos connosco a Manuel Rei para falarnos de Castelao, desta terra e deste tempo.
Concibimos a Castelao como un “todo” no que -como en calquera persoa- hai unha evolución e unha diversidade de experiencias e momentos; isto é, como unha totalidade estratificada, tanto no pensamento como na práctica (pintor, caricaturista, escritor e político). Non como un fenómeno ou suma de fenómenos atomizados ou parcializados, de compartimentos estancos, senón como diálogo declarado e intertextualidade manifesta. Non está o artista confrontado ou illado do político nin o político á marxe do artista, como ben el mesmo se encargou de advertir en innúmeras ocasións. Hai sintonía de intereses e obxectivos entre ambas as dúas facetas.
Manuel Rei é autor da primeira monografía sobre toda a obra literaria de Castelao, titulada Arte e verdade. A obra literaria de Castelao (1991). Divulgador do pensamento e da actuación política de Castelao desde esa data, con charlas por toda a nosa xeografía e fóra dela. Autor de varios libros sobre Castelao: Castelao e Sempre en Galiza, Afonso Daniel Castelao, Castelao: Desta Terra, deste tempo, Volver a Castelao, 2011.
