O venres 15 de maio, ás 19:30 horas, dentro do Cineclub Bóveda presentamos a proxección de A Fidai Film (2024), do cineasta palestino Kamal Aljafari.
Premio Cineuropa en 2025 e obxecto de retrospectivas en festivais coma o Indielisboa ou Documenta Madrid, o palestino Kamal Aljafari leva dúas décadas construíndo unha obra que compatibiliza un inequívoco compromiso coa causa da súa nación coa lucidez e o rigor na análise das raíces da barbarie. Grazas á xenerosidade do cineasta, temos a honra de programar, por primeira vez na cidade, a súa obra mestra A Fidai Film, que se vale de material de arquivo para contar, sen medo á experimentación formal, un século de asoballamento. Simplemente un dos filmes máis importantes dos últimos anos.
