O venres 13 de marzo, ás 19:30 h, no noso local, organizamos unha nova sesión do Cineclub Bóveda coa terceira entrega do ciclo dedicado ao cineasta alemán Christian Petzold, que desenvolvemos en colaboración co Instituto Goethe. A sesión presenta un relato arredor dun refuxiado político na Segunda Guerra Mundial que ten a audacia de empregar unha ambientación contemporánea para tecer un elocuente paralelismo entre pasado e presente. Unha nova e fascinante relectura do melodrama clásico, con Casablanca como referente posíbel e un magnífico Franz Rogowski como protagonista.
