O luns 9 de marzo, ás 20:00 h, acolleremos a presentación do libro Crónicas transatlánticas. De cinza e sal, editado por Laiovento. Contaremos coa presenza do seu autor, o historiador Bieito Alonso, para debullar unha obra que rescata do esquecemento a memoria das “seres de abaixo”.
Neste ensaio, Alonso afonda nas historias de vida de fogueiros, mariñeiros e estibadores: homes-máquina que acompasaban o seu ritmo vital coas caldeiras e os motores, traballando en condicións de extrema dureza, explotación e invisibilidade. O libro pon o foco naqueles emigrantes galegos que, malia seren considerados marxinais nos xornais ou na academia, exerceron como verdadeiros líderes sociais e sindicalistas nos portos da América atlántica.
Bieito Alonso (Ourense, 1958) é un prestixioso historiador cunha dilatada traxectoria no estudo do nacionalismo e do movemento obreiro. Entre a súa prolífica bibliografía destacan obras fundamentais como O exilio de Castelao (1939-1950), O sindicalismo nacionalista galego ou Anarquistas galegos en América, traballo polo que recibiu o Premio da Crítica de Galicia en 2020. Con Estendendo a rebelión, tamén foi galardoado co Premio Manuel Murguía de Ensaio en 2021.
Nesta sesión, teremos a oportunidade de conversar con el sobre como estas crónicas transatlánticas reconstrúen un mundo volátil e líquido que, ata hoxe, permanecía fuxidío tal que sombras baixo a cuberta dos grandes barcos.
