O mércores 14 de xaneiro, ás 19.30 h, achegarémonos á historia recente de Ruanda coa charla “Da historia dos meus pais á miña: unha viaxe ruandesa”. A sesión estará marcada polo percorrido dende o xenocidio de 1994 ata a laboriosa reconciliación nacional actual.
A través da historia da súa propia familia, Béni Ndayisaba dará conta da memoria daqueles meses traumáticos, os xuízos posteriores e a difícil volta á normalidade nun país que nos últimos vinte anos experimentou un crecemento económico sostido e grande. Béni Ndayisaba é un estudante de 24 anos de economía internacional que chegou á Coruña no marco dun intercambio universitario. Naceu en Gikondo, Ruanda, mais criouse en París dende moi pequeno canda os seus pais e irmáns.
