O venres 17 de abril, ás 19.30 h, acollemos a presentación de Depósitos de ancestralidade. Histórica crítica do realismo máxico galego. «Iso é realismo máxico galego!». Esta frase, repetida ata converterse nun lugar común, suxire que en Galiza a fantasía brota da terra como unha forza natural. Pero e se esta idea, lonxe de ser unha verdade ancestral, fose en realidade unha sofisticada construción cultural?
Neste ensaio, publicado na colección Clara Corbelhe da editorial Laiovento, o autor Pablo Pesado emprende unha viaxe de deconstrución histórica para demostrar que o realismo máxico galego foi un fenómeno importado, mediado e funcional a intereses políticos e literarios moi concretos. O acto contará coa participación do propio autor.
Pablo Pesado (Santiago de Compostela) é profesor de Lingua e Literatura Galega e investigador en Estudos da Literatura e da Cultura. Está especializado na análise marxista e sociolóxica dos campos literarios e nos procesos de perda de autonomía na literatura contemporánea, con especial atención ao sistema galego. Desenvolveu estancias de investigación en centros internacionais de referencia e é autor de diversos estudos sobre realismo máxico, extractivismo cultural e as relacións entre literatura, poder e mercado. En 2023 publicou a novela Gastrulación (Boadicea).
