O luns, 18 de agosto, ás 19.30 h, como todos os anos, conmemoramos o Día da Galiza Mártir, en Catro Camiños, diante da escultura a Alexandre Bóveda.
A Irmandade Galega de Arxentina, presidida por Castelao, decidiu instituír, o 17 de agosto, coincidindo co aniversario do fusilamento de Bóveda, como o día da Galiza Mártir.
Neste día, personificando en Alexandre Bóveda, figura clave para o nacionalismo galego, fundador e logo secretario de organización do Partido Galeguista, vítima da barbarie fascista, vilmente asasinado na Caeira (Poio, Pontevedra), rendemos homenaxe a todas as persoas represaliadas e lembramos, igualmente, todas as vítimas da represión franquista.
Contaremos coas intervencións de Goretti Sanmartín, alcaldesa de Santiago, e Marisol García Juárez, presidenta da AC Alexandre Bóveda.
E como xa é tradición, teremos unha pequena intervención musical, nesta ocasión a cargo de Davide Salvado e Fransy González, dúas das voces máis representativas da música tradicional galega. Davide, músico autodidacta que recolleu e reinterpretou cantigas populares por toda Galicia, foi distinguido nos Premios Martín Códax de música tradicional (2014 e 2017), formou parte de proxectos como Ecléctica Ensemble e presentou Galicia no WOMEX 2014 co seu trío solo trad + contemporáneo. Pola súa banda, Fransy González, que participou nun grupo de investigación para recoller cantos tradicionais na comarca de Bergantiños, levou a cabo un intenso labor de recuperación do repertorio vocal tradicional e colaborou con artistas como Carlos Núñez, Dulce Pontes e Jordi Savall, entre outros. Actualmente, ambos artistas traballan xuntos nun proxecto musical do que tamén forma parte Cibrán Seixo.
