Tras o éxito da primeira convocatoria que encheu o aforo, o martes 27 de xaneiro ás 19:30 horas, no Planetario da Casa das Ciencias, organizamos unha nova sesión titulada “Eclipses no cinema”, conducida polo crítico e divulgador Martin Pawley.
Trátase dunha actividade especial organizada en colaboración coa Agrupación Astronómica Coruñesa Ío. O 12 de agosto de 2026, Galiza, e en especial A Coruña, vivirán un fito histórico: o único eclipse solar total en máis dun século. Será un evento astronómico de primeira magnitude. Para celebrar este acontecemento, propoñemos unha sesión na que revisaremos unha selección de filmes onde a ocultación do Sol pola Lúa cobra un papel protagonista.
Durante a sesión analizaremos como o cine retratou este fenómeno, con exemplos tan grandiosos como o reto técnico do clásico Barrabás, onde se filmou un eclipse real. Unha oportunidade perfecta para unir ciencia e cine nunha contorna inmellorable.
As prazas son limitadas á capacidade do planetario, así que a admisión será por orde de chegada.
