O luns 29 de decembro, ás 19.30 h, trasladámonos ao Planetario da Casa das Ciencias para unha actividade especial organizada en colaboración coa Agrupación Astronómica Coruñesa Ío.
O 12 de agosto de 2026 Galicia, e moi especialmente A Coruña, vivirá un fito histórico: a única eclipse total de Sol en máis dun século. Será un evento astronómico de primeira magnitude que atraerá a miles de visitantes. Para celebrar a inminente entrada no ano da eclipse, propomos unha sesión na que repasaremos unha escolma de filmes onde a ocultación do Sol pola Lúa ten un papel protagonista.
Durante a sesión analizaremos como o cinema retratou este fenómeno, con exemplos tan grandiosos como o desafío técnico do clásico Barrabás, onde se chegou a filmar unha eclipse real. Unha oportunidade perfecta para unir ciencia e cine nun escenario inmellorable.
