O xoves 12 de marzo, ás 19:30 h, acollemos a inauguración de FERIDAS, a nova exposición da artista visual María Xosé Ares. O acto contará coa actuación musical de Sara Gimeno.
Nesta mostra, o fío condutor é a expresión das doenzas que sofre e provoca a nosa sociedade. A metáfora sérvese mediante a representación de elementos orgánicos —peixes ou troncos de árbores— que asumen o protagonismo destas mancadelas. De forma deliberada, a artista evita a representación directa do ser humano, deixando que a natureza, lacerada e mutilada, actúe como espello e ferida da propia condición humana.
María Xosé Ares é unha artista visual nada en Lugo e afincada en Cangas, formada en Arquitectura Técnica e Belas Artes. Na súa práctica artística, a pintura ao óleo foi e segue sendo o eixo central, técnica que combina co uso de materiais como o papel seda para producir veladuras húmidas e secas. A súa obra destaca pola creación de atmosferas difusas e unha marcada intensidade na cor, factor característico dende o inicio dos seus traballos.
A exposición poderá visitarse na nosa sede ata o 12 de abril de 2026.
