O venres 12 de xuño, ás 19.30 h, terá lugar no noso local a presentación e palestra Fotografías de Bélxica e Flandes. Esta actividade estará a cargo de Roberto Catoira, quen foi presidente da nosa entidade, e que compartirá a través dun relatorio e unha proxección visual as súas experiencias e as mellores estampas da súa viaxe polas terras belgas e flamengas.
Na actualidade, Roberto Catoira compaxina o seu labor como profesor coa súa activa participación na emisora comunitaria Cuac FM, onde dirixe «Recendo», o noso magacine cultural radiofónico de referencia sobre cultura galega. Convidámosvos a realizar este percorrido xunto a el para achegarnos á arquitectura, á historia e ás paisaxes destas rexións europeas.
