O venres 25 de abril, ás 19.30 h, inauguramos no noso local a exposición fotográfica Ailalelo do colectivo Ollo de Vidro.
O colectivo de fotografía Ollo de Vidro, integrado na AC Alexandre Bóveda, quere contribuír a poñer en valor a importancia da transmisión do noso patrimonio cultural inmaterial expresado a través do legado musical, valorar especialmente o labor das mulleres pandeireteiras que mantiveron as músicas e as letras tradicionais en tempos escuros e difíciles, superando as críticas e a oposición dunha parte da sociedade galega.
Tamén queremos destacar o traballo de múltiples persoas que foron quen de recoller todo ese patrimonio: músicas, danzas, letras e poñelo a disposición do noso goce. A todas elas o noso agradecemento porque a conservación e difusión deste patrimonio contribúe a que Galiza soe con voz propia no universo dos pobos.
Participan nesta exposición:
Zapatos de chiculate
tenos a miña cadela
pra levar as ovelliñas
ás feiriñas de Nadela.
Ai, lalelo, ai, lalalo.Aló vén o gaiteiro
por detrás do pinar,
ata os pinos lle axudan
á gaitiña a tocar.
Aló vén o gaiteiro
por detrás do pinar.Indo eu pra non sei onde,
vendo eu a non sei quen,
na porta de xa me entendes…
non me poido acordar ben.
Ai, lalelo, ai, lalalo.Andivécheste alabando
polos muíños moendo,
que te casabas comigo
e iso era en eu querendo.
Ai, lalelo, ai, lalalo.A rula vaise queixando,
que lle levaron o niño,
quen cho mandou facer rula
tanto á beira do camiño?
Ai, lalelo, ai, lalalo.Algún día ben pensaches
do meu corazón ter froles,
agora vai aos codesos
que chos hai nos arredores.
Ai, lalelo, ai, lalalo.
