O venres, 23 de xaneiro, ás 19:00 horas no noso local social, damos comezo a un ano histórico. Este 2026 marca o cincuenta aniversario da nosa andaina, un camiño iniciado nun momento crucial para Galicia e que hoxe, cinco décadas despois, segue máis vivo que nunca. Para iniciar esta conmemoración, temos o pracer de convidarvos á inauguración da exposición “Memoria, Cultura, País: Medio século de ACAB”.
Medio século de compromiso
A mostra propón un percorrido visual e emocional pola nosa historia a través de paneis, cartaces, folletos, fotografías e lembranzas que testemuñan a incesante actividade da Agrupación. Desde aquel 17 de agosto de 1976, cando a elección do nome e a data foron actos deliberados para situar a asociación nunha perspectiva nacionalista e democrática, ata a realidade plural e dinámica de hoxe.
Como reza o texto que preside esta conmemoración e que poderedes ler na exposición:
“O 17 de agosto de 1976, nun contexto aínda marcado polo silencio e a incerteza, un grupo de persoas decidiu fundar a Agrupación Cultural Alexandre Bóveda. A elección rendía unha homenaxe simbólica vencellada á memoria do galeguismo democrático e á defensa da lingua e da cultura como ferramentas de futuro. Crear era, daquela, unha forma de resistencia.
Cincuenta anos despois, esa convicción segue intacta. O percorrido realizado mídese contando coas persoas que sostiveron un proxecto colectivo baseado no compromiso social. Desde a defensa do uso do galego en todos os ámbitos como eixo e coa práctica viva e crítica da cultura como fin.
A coherencia mantida ao longo de medio século permitiu construír un espazo aberto e atento ao mundo. Un lugar onde a cultura é unha maneira de construír comunidade, memoria e presente.”
Un reencontro coa nosa historia viva
Este acto non é só unha ollada ao pasado, senón unha celebración das persoas que o fixeron posible. Contaremos coa presenza especial de Margarida Vázquez Veras, a nosa primeira presidenta —cuxa elección en 1976 marcou dende o inicio o noso compromiso co feminismo e a renovación—, así como con moitas das compañeiras e compañeiros que formaron parte das xuntas directivas e da masa social ao longo destes anos.
Esta exposición é o punto de partida dun programa de actividades que se desenvolverá durante os vindeiros 12 meses. Agardámosvos para compartir este momento de memoria e futuro, que remataremos cuns petiscos e un viño para celebrar xuntas este acontecemento festivo.
