O venres 8 de maio, ás 19:30 horas, dentro do ciclo Outras Historias do Cinema, contamos coa presenza de Martin Pawley, crítico e programador cinematográfico, para achegarnos á figura de Jocelyne Saab.
O presente convulso en que vivimos fai cada día máis valiosa a obra documental desta directora libanesa, quen nas décadas dos 70 e 80 fixo reportaxes e filmes sobre a causa palestina, a revolución islámica en Irán, a resistencia do pobo saharauí e a guerra civil no seu propio país. A súa obra, que tamén abrangue a ficción, evidencia un firme compromiso feminista e unha intelixencia única para captar o lado xusto da Historia. Esta sesión rende homenaxe a unha das cineastas que máis urxe reivindicar no panorama actual.
