O venres 24 de abril, ás 19.30 h, Alba Moledo falaranos da xornalista María Luz Morales.
María Luz Morales (A Coruña, 1890-Barcelona, 1980), naceu nunha casa da parte alta da cidade. Coruñesa de nacemento e corazón, desenvolveu en Barcelona unha carreira pioneira no xornalismo, ata converterse na primeira directora dun xornal de gran tiraxe no Estado (La Vanguardia), durante a Guerra Civil. Isto ocasionoulle a cadea, a prohibición de exercer o xornalismo, e o esquecemento. Sen embargo, o seu profundo arraigo galego fixo que chegara a implicarse no desenvolvemento do galeguismo, sempre en contacto coa terra de querenza.
Proxectaremos tamén o documental biográfico de Óscar Losada –xornalista especializado en cultura e deportes– sobre María Luz Morales.
Alba Moledo Ucha é doutora en Xornalismo pola Universidade Complutense de Madrid. A súa tese doutoral é a primeira no Estado Español que recupera un século de vida e obra da xornalista María Luz Morales, tras unha década de investigación. Traballa tamén como xornalista en Diario de Pontevedra.
