O xoves 3 de abril ás 19.30 h teremos un encontro con Xabier Díaz para falarnos do canto tradicional.
Nesta palestra propón explicar como as melodías tradicionais son interpretadas, recollidas e posteriormente arranxadas para se deslocaren aos escenarios, facendo así que eses cantares, desde as aldeas e rueiros do país ou desde os cancioneiros editados, pasen a ser coñecidos por uns públicos máis amplos capaces de os admiraren.
Xabier Díaz é unha das figuras actuais máis representativas da música de orixe tradicional na Galiza. Cunha dilatadísima experiencia na recolleita e interpretación de melodías transmitidas secularmente durante xeracións, fixo parte de Xacarandaina, Rumbadeira, Berrogüetto ou aCadaCanto. Desde 2014, con varios discos publicados de excelente acollida por parte do público e da crítica nacional e internacional, faise acompañar polas Adufeiras de Salitre, formación con que leva participado nuns 400 concertos en prestixiosos festivais na Galiza, na Europa e na América.
