O mércores 25 de febreiro, ás 19.30 h, Carmela Galego ofrécenos unha palestra co título de O sufrimento da arte en tempos de guerra. Europa anos 30. Nesta sesión analizaremos o patrimonio bombardeado, as obras roubadas e os artistas represaliados/as, partindo de que o sufrimento da creatividade humana é multiforme cando se perde o respecto pola propia vida. A relevancia social que van cobrando as artes ao longo da historia da cultura contemporánea fai que estas acaden un protagonismo considerable nas dúas guerras que teñen o seu marco cronolóxico a final dos anos trinta e principios dos corenta do século XX. Situaremos o foco en Europa e observaremos ese impacto para cuestionármonos sobre a vixencia desas consecuencias.
Carmela Galego é historiadora da arte e profesora de francés. A súa traxectoria profesional está enfocada á comunicación e á docencia en contextos lúdicos e culturais.
