Dentro do ciclo “Pensando a Ciencia”, o mércores 17 de xuño ás 19.30 h, Luis Martínez Otero falaranos de Mentes materiais. O neurocientífico galego é un dos investigadores principais do proxecto “XSCAPE – Material Minds”. Esta ambiciosa iniciativa científica, liderada dende Galiza, combina arqueoloxía, neurociencia visual, filosofía cognitiva e estudos sobre a cultura material. O seu obxectivo é constatar se as estruturas materiais dos asentamentos humanos, os edificios, as paisaxes e os artefactos contribúen activamente a cambiar os padróns de pensamento e atención, axudando así a comprender mellor a emerxencia da mente e da racionalidade humana.
Luis Martínez Otero é doutor en Ciencias Biolóxicas pola USC e completou a súa formación posdoutoral na Universidade Rockefeller de Nova York. Tras exercer como científico titular do CSIC no Instituto de Neurociencias de Alicante, vén de anunciar o seu regreso a Galiza a través do programa de captación de talento Opportunius.
