Dentro do ciclo Outras historias de cinema, Martin Pawley, produtor e crítico de cinema, ofrécenos o xoves 6 de marzo, ás 19.30 h, unha nova sesión de Pioneiras da crítica, para falarnos de Silvia Mistral.
Nacida na Habana mais galega por parte de nai, Hortensia Blanch Pita tivo unha vida apaixonante e comprometida coa causa antifranquista. Ela foi unha das emigrantes a México a bordo do Ipanema, o barco que tamén levou ao exilio a Florencio Delgado Gurriarán, Ramón Cabanillas fillo ou Serafín Ferro. Mais antes diso foi unha nena que fixo a primaria en Vilalba e logo unha activa escritora cinematográfica que nos anos 30 colaborou con diversas revistas españolas. A través da súa intensa relación co cinema recordamos hoxe a peripecia vital de quen foi, ademais, autora de dous libros extraordinarios, “Éxodo” e “Madréporas”.
