O luns 14 de setembro, ás 20 horas, presentamos a biografía ilustrada Begoña Caamaño, unha obra publicada por Edicións Embora que achega ao público infantil e xuvenil a vida e o legado da escritora e xornalista homenaxeada coas Letras Galegas 2026. O acto contará coa presenza da súa ilustradora, Nerea Gómez, e dos coautores dos textos, Icía Varela e Xosé Manuel Varela, que estarán acompañados na presentación pola escritora Emma Pedreira.
O libro é un rigoroso percorrido pola infancia, a formación e a traxectoria de Caamaño nos medios de comunicación, destacando o seu fondo compromiso coa lingua galega, a igualdade, o feminismo e a memoria. A obra detense dun xeito especial nas súas dúas novelas principais, Circe ou o pracer do azul e Morgana en Esmelle, onde a autora revisou os mitos clásicos e artúricos para darlles voz ás mulleres. Inclúe, ademais, recursos visuais como mapas e redes de personaxes que facilitan a comprensión do universo literario das súas obras.
As persoas responsables desta publicación combinan talento artístico e rigor literario. Nerea Gómez (Culleredo, 1996), graduada en Belas Artes, achega unha sensibilidade poética e unha marcada experimentación plástica. Icía Varela (Malpica, 2000), filóloga e recoñecida música de traxectoria internacional, e Xosé M. Varela (Malpica, 1967), docente e histórico dinamizador cultural da Costa da Morte, asinan uns textos sinxelos pero profundos. Xuntos conforman unha porta de entrada perfecta para descubrir a vixencia do pensamento dunha autora fundamental da nosa cultura.
DATOS DO EVENTO
Inscrición necesaria
