O sábado 17 de outubro, ás 12 da mañá, Manuel Rivas presenta no noso local a súa última obra, A revolución dos vagalumes, editada por Xerais.
«Vivimos na distopía, nun mundo dominado pola Maquinaria de Facer Desacougar. A revolución dos vagalumes describe ese tempo histórico desapiadado, onde a aceleración retrógrada vai da man do tecnofeudalismo, dos negacionismos e dun narcisismo tirano. Mais hai unha constelación de xentes e de pobos que non se afai á inxustiza e exerce o dereito a soñar sen medo», sinala Rivas sobre este novo traballo.
Nun contexto no que unha Maquinaria de Facer Desacougar semella marcar o rumbo do planeta coma unha apisoadora de aceleración retrógrada cara á descivilización, o libro eríxese nunha resposta urxente e lúcida. Rivas diagnostica ese «mal de aire» que actúa como pesticida do pensamento e herbicida das palabras: un novo DDT sostido sobre o Despotismo, a Depredación e un Terror semántico que tenta normalizar proclamas canallas coma «La guerra è bella!». Diante do conformismo e a submisión das elites intelectuais e mediáticas, A revolución dos vagalumes desarma os discursos negacionistas e convoca as palabras a volver escoitar, dicir e facer fronte a este feísmo inmoral. Un manifesto para rescatar a pulsión creativa e xerminal que a humanidade comparte coa natureza, esa constelación de rebeldía coa que exercer, sen concesións, o dereito a soñar sen medo.
Manuel Rivas (A Coruña, 1957) é un dos narradores e poetas máis recoñecidos e traducidos da literatura galega contemporánea. Membro da Real Academia Galega e recoñecido co Premio Nacional das Letras Españolas, a súa traxectoria como escritor e xornalista abrangue décadas de compromiso inquebrantable coa defensa do territorio, a memoria histórica e as liberdades cívicas.
