O luns 19 de xaneiro, ás 20.00 horas, terá lugar no noso local a presentación do libro Comandantes e familiares, a nova novela de Xavier Alcalá publicada por Editorial Galaxia. Esta obra supón a segunda entrega da Triloxía dos Mayimbes, dando continuidade á narración iniciada con A capital do mundo e antecedendo a Tempo de fugas.
A trama trasládanos á Habana de 1961, onde a protagonista, Nieves Docampo, non dá esquecido o seu amor coruñés, mais acepta casar cun cardiólogo famoso e “imprescindible” para o sistema castrista. A través desta unión, Nieves introdúcese no núcleo dos “mayimbes” e pasa a ser coñecida como “La Galle” por figuras históricas como Fidel, Raúl, o Che ou Celia Sánchez, vivindo con privilexios na barafunda da revolución. Xavier Alcalá, enxeñeiro e autor de obras emblemáticas como A nosa cinza, constrúe un relato man a man coa realidade histórica sobre a epopea da emigración.
Acompañará ao autor Xosé María Dobarro, catedrático de Lingua e Literatura Galega.
DATOS DO EVENTO
Inscrición necesaria
