O luns 16 de marzo ás 20.00 h, acollemos a presentación de O Rei Sabio, de Simon R. Doubleday. Esta obra, editada polo Servizo de Publicacións da USC, inaugura a colección Kátaba de temas medievais e supón a primeira tradución a unha lingua allea ao inglés do orixinal publicado en 2015.
Non se trata dunha simple tradución, senón dunha revisión profunda na que o autor afonda nos elementos vinculados a Galiza. A obra ofrece unha fermosa biografía de Afonso X, o “rei filósofo”, cuxa fascinación pola cultura islámica deixou unha pegada indeleble na civilización occidental e facilitou o camiño cara ao Renacemento europeo.
O acto consistirá nun coloquio a tres bandas no que intervirán:
Simon R. Doubleday: Investigador distinguido Beatriz Galindo na USC e autor do libro. Tras décadas como docente na Hofstra University de Nova York, é actualmente profesor na Facultade de Xeografía e Historia da USC e colaborador habitual na prensa galega.
Miguel Giadás Quintela: Profesor de Filoloxía Latina na USC e tradutor da obra.
Xosé M. Andrade Cernadas: Catedrático de Historia Medieval na USC, que conducirá o debate.
No coloquio abordaranse cuestións relativas ao medievo e os retos da arte de verter un texto histórico a outra lingua. Ao remate, poderanse adquirir exemplares asinados polo autor e polo tradutor.
