O martes 15 de abril, ás 19.30 h, acollemos a presentación do libro Personaxes da Galiza medieval II.
A Asociación Cultural O Galo de Santiago está a editar unha colección sobre personaxes da Galiza medieval, para contar a historia de homes e mulleres que desempeñaron na nosa Terra un rol relevante, entre os séculos VI e XV. É importante coñecer a nosa historia e tomar conciencia sobre a ocultación e deturpación que sufriu canto sucedeu aquí ao longo dos séculos.
Coa elección destes personaxes do medievo, na AC O Galo, pretenden dar a coñecer a capacidade de decisión e de intervención na política peninsular que acadou o reino de Galiza nese período fronte a unha concepción monolítica e centralista do Estado español que silenciou a importancia destes personaxes.
Reinterpretar a tradición e a historia constitúe algo básico para activar, asentar e modernizar a identidade e os comportamentos dos pobos.
As biografías que aquí se recollen son as da raíña Dona Sancha, Fernando e Vermudo Peres de Trava, o arcebispo Bernardo II, Paio Gómez Chariño, Afonso Soares de Deza, Pedro Fernández de Castro e Fernando Ruis de Castro.
Contaremos nesta presentación co historiador Xosé Miguel Andrade Cernadas, catedrático na USC (coautor desta obra) e con Mª Antonia Pérez, profesora titular na UDC.
As persoas que nos acompañen levarán de agasallo este libro que se editou grazas a unha axuda da Deputación da Coruña.
