O luns 23 de marzo ás 20:00h, a Cátedra de Memoria Histórica da UDC organiza, coa nosa colaboración, a presentación e proxección do filme Sempre en Galicia. Voz e pensamento galeguista na emigración. O acto contará coas intervencións de Xan Leira, director do documental e responsable de Memoria Documental de Galicia, e de Uxío-Breogán Diéguez, director da citada Cátedra.
Esta produción, realizada entre os anos 2024 e 2025 cunha duración de 47 minutos, rodouse entre Montevideo e Galicia para conmemorar o 75 aniversario do programa radiofónico máis lonxevo da nosa historia. O documental profundiza na figura de Antón Crestar, quen impulsou este espazo en 1950 tras o falecemento de Castelao, contando co apoio de figuras clave do exilio como Manuel Meilán, Lois Tobío ou Alfredo Somoza.
“Sempre en Galicia” erixiuse como unha ponte cultural ininterrompida entre o Río da Prata e a terra nai, sendo durante décadas o único foro radiofónico en lingua galega. A través de testemuñas actuais e históricas, a fita analiza como este programa se converteu nun símbolo de resistencia política e nunha ferramenta fundamental para a difusión da nosa intelectualidade, música e literatura nun contexto de dispersión e exilio.
