O xoves 21 de maio, ás 19:30 horas, acollemos a proxección do documental Regueifando con pracer, seguida dun coloquio coas súas protagonistas.
Contaremos con Raquel “a Doallo”, unha das impulsoras do documental xunto coa socióloga e terapeuta María García “SRA. Placerful”; e con Alba María, regueifeira e docente, que tamén participa no documental, que é unha proposta que celebra a regueifa e o pracer como ferramentas de transformación social.
Raquel “a Doallo” é docente, activista da economía feminista e solidaria… e regueifeira desde hai 3 anos, cando coñeceu as posibilidades da improvisación oral como ferramenta pedagóxica, cooperativa e transformadora. Desde “aopaso” (www.aopaso.gal) apoia proxectos diversos desenvolvidos por ONGD, é formadora no eido do autoemprego colectivo con persoas adultas e tamén leva adiante nas aulas galegas obradoiros formativos e propostas participativas con mocidade.
Alba María é cantora, improvisadora oral e profesora de lingua e literatura galegas no ensino medio. Traballa no eido da regueifa, dinamizando desde hai 15 anos este xénero de improvisación oral con obradoiros, charlas, investigacións e proxectos multidisciplinares, vinculando poesía, oralidade, música e feminismo a partes iguais. Escribiu o libro Regueifa en Bergantiños e o disco Aínda, ambos con a Central Folque.
