O xoves 16 de outubro, ás 19.30 h, teremos un novo encontro do ciclo Revisar os marcos, que facemos coa Fundación Luzes. A temática desta sesión é Despois do lume e conversaremos con Xandro García, coordinador de ADEGA – A Coruña.
Non só arde a terra, arde tamén a nosa forma de habitala. Cada verán, o lume volve coma un recordatorio feroz: a emerxencia climática non é un horizonte alleo, senón un presente que tamén deixamos prender. Máis temperatura, máis seca, incendios cada vez máis perigosos, máis violentos. E, así e todo, seguimos reducindo todo a cifras de hectáreas queimadas, custos de recuperación, números estimados para o despois da catástrofe.
