O sábado, 22 de novembro, ás 12 horas, realizaremos este roteiro literario arredor da figura de Syra Alonso, coa guía de Patricia Angulo, David Lozano e Carmela Galego.
Camiñar ten algo de terapéutico. Escribir tamén cauteriza as feridas. Syra bota a andar desde a súa casa de Liáns até un cárcere á beira dun faro. Doce quilómetros de pasos para afastar os medos todos e tratar de atopar uns folgos que ben sabía que precisaría. Até en dúas ocasións e con sete anos de diferencia péchase co seu lapis para narrar a súa memoria de Muller Muro. Neste roteiro percorreremos os espazos da súa vida e da súa literatura. Luz, serenidade, valentía e forza. Acompañádenos nesta maña de novembro para transformar as rúas en palabras e narracións. A memoria de Syra e Francisco Miguel atópase entre as grandes historias da nosa cidade agardando a ser coñecida.
O roteiro sairá desde San Nicolás percorrendo as rúas da Pescaría até chegar ao Ensanche.
Para facer máis agradable este roteiro levaremos as nosas radioguías polo que é imprescindible anotarse. Só se garante o acceso á radioguía mediante o proceso de inscrición.
