O martes 10 de febreiro, ás catro da tarde, no Muncyt (Museo Nacional de Ciencia e Tecnoloxía), sito na praza do Museo Nacional de Ciencia, 1, realizaremos unha visita guiada á exposición “Porto Negreiro”. Esta mostra, desenvolvida no marco do proxecto A Coruña entre memorias: historia, colonialismo e identidade, propón unha revisión crítica da memoria colonial da nosa cidade e do papel que o seu porto desempeñou no tráfico transatlántico de persoas escravizadas durante os séculos XVIII e XIX.
A través de documentos, imaxes e voces diversas, a exposición revela as conexións entre progreso e violencia, así como as rutas, fortunas e silencios que sostiveron a trata. O percorrido convida a recoñecer as pegadas deste pasado na arquitectura, na economía e no imaxinario urbano, reflexionando sobre como estas herdanzas continúan condicionando o presente.
“Porto Negreiro” expón un exercicio de memoria que interpela á cidade e a quen a habita, cuestionando os relatos hexemónicos e abrindo espazo a aquelas historias que foron sistematicamente silenciadas. En diálogo coas migracións contemporáneas e as desigualdades históricas, a mostra propón repensar a relación entre pasado colonial, identidade e xustiza social.
O proxecto está dirixido por Zinthia Álvarez Palomino e Cristina Botana Iglesias, cuxas traxectorias conflúen nunha maneira compartida de entender a historia como un campo de disputa política e ética. Ambas parten da necesidade de revisar quen contou a historia, desde onde e con que ausencias, recuperando narrativas invisibilizadas a través dun diálogo continuo entre a cidade e a memoria.
