O xoves 9 de abril ás 19.30 h, dentro do ciclo “Outras historias do cinema”, rendemos homenaxe a Youssef Chahine no ano do centenario do seu nacemento. Durante a maior parte do século XX, falar de cinema árabe equivalía a falar de cinema exipcio: o 75% dos filmes producidos na rexión que comprende o Magreb e o Oriente Medio eran deste país. A fortaleza industrial e comercial do cinema exipcio permitiu a consolidación de autores que acadaron prestixio crítico internacional como Henry Barakat ou Salah Abu Seif, pero sobre todo Chahine, o máis recoñecido cineasta do mundo árabe e creador de películas excepcionais como ESTACIÓN DO CAIRO, A TERRA ou ALEXANDRÍA POR QUE?
A sesión correrá a cargo de Martin Pawley, crítico e programador cinematográfico.
