A escultura da Praza do Humor da Coruña rende homenaxe ao escritor Wenceslao Fernández Flórez. Nado na Coruña en 1885, publicou arredor dunhas corenta novelas e libros de relatos de humor, caracterizados estes por un humor con moita retranca.
Nos Xardíns de Méndez Núñez –enfronte do edificio da Terraza– atopamos outro monumento dedicado a Wenceslao Fernández Flórez na Coruña.
Ambientado na parroquia de Cecebre (Cambre) –alí encóntrase a casa museo do autor–, O bosque animado é unha das súas obras máis coñecidas. Publicada en 1943 en castelán, foi traducida ao galego pola poeta Xela Arias e publicada en 1987.
Baseadas na novela O bosque animado fixéronse dúas películas: a dirixida por José Luis Cuerda en 1987 e –en 2001– a primeira película de animación 3–D realizada en Europa.
As vidas no bosque eran prácidas, só interrompidas polo paso do home, ao que acompaña a traxedia, xa que pola súa cobiza explota o bosque. A cinta animada seguro que lles gustaba aos nenos e nenas do CEPI Wenceslao Fernández Flórez da Coruña, alí próximo á Estación de Ferrocarril.
Wenceslao Fernández Flórez faleceu en Madrid en 1964. Os seus restos descansan no Cemiterio de Santo Amaro da Coruña.
