“Non hai plena consciencia da situación do galego na sociedade de hoxe”. A anterior é unha afirmación do profesor Xosé Ramón Freixeiro Mato. Segundo el, o ano 2009 supuxo unha inflexión na normalización da lingua ao introducírense medidas regresivas contra o noso idioma. Reclama unha nova Lei de Normalización Lingüística que aposte polo galego xa que estamos nun momento crítico para a lingua: o galego ten futuro mais para iso temos que traballar.
Coincide co profesor Freixeiro a profesora e deputada Mercedes Queixas Zas na necesidade dunha nova Lei de Normalización Lingüística. Segundo ela, debe ser a única lei galega que leva corenta anos sen sufrir ningún cambio, sen adaptarse aos novos tempos.
A profesora Mercedes Queixas sinala que a Xunta ignora obscenamente as recomendacións sobre o galego do Consello de Europa ao incumprir sistematicamente a Carta Europea das Linguas Minoritarias e Rexionais. A deputada salientou o fracaso do Decreto de Plurilingüismo porque, segundo se demostrou, non serviu para aprender máis inglés nin para aprender máis galego e si para aprender máis castelán.
Necesitamos que medre a lingua, mais para iso non queremos que a escola sexa un motor desgaleguizador, senón todo o contrario.
Precisamos que medre a lingua, e para iso non queremos un goberno que se empeñe en facela desaparecer e un presidente da Xunta que se manifeste en contra da lingua do país da man dos sectores máis reaccionarios.
Queremos que medre a lingua, mais para que así sexa precisamos dotármonos de leis que axuden na normalización, non que a impidan. Hai que modificar a actual Lei de Normalización Lingüística que leva corenta anos de fracaso. Precisamos derrogar o Decreto de Plurilingüismo, ese decreto da vergoña, e substituílo por un Decreto da Igualdade Lingüística real.
Desexamos que medre a lingua e para iso temos que aproveitar as posibilidades da lusofonía desenvolvendo a lei Valentín Paz Andrade, algo que ata o de agora non se fixo.
Pedimos –para que medre a lingua– que o goberno da Xunta elabore medidas normalizadoras, algo que non fixo nos trece últimos anos. Tamén, que todos os concellos galegos se impliquen decididamente na normalización lingüística.
Tal como dixo Castelao, se aínda somos galegos é por obra e graza do idioma, por iso queremos que MEDRE A LINGUA para que así MEDRE GALIZA.
