Luz Pozo Garza (Ribadeo,1922 – A Coruña, 2020) publicaba en 2005, As arpas de Iwerddon. Nel aparece o poema “Torre de Breoghan”.
TORRE DE BREOGHAN
ITH fillo de Breoghan
esculcaba o horizonte desde o alto
da Torre de Brigantia
Era nunha noite clarísima de lúa
Era como un espello toda a palma do mar
E daquela albiscou unha terra moi lonxe
quizais era unha illa envolvida nas albas
mar por medio
E chamou polos seus con alborozo
Non vexo senón nubes
respondéralle Bred fillo de Breoghan
Ith era experto en singraduras
Ith era sabio e moi perseverante
Ith impuxo a súa teima de conquistar Irlanda
Partiron cara ó Noroeste co corazón gozoso
e con todas as xentes da súa tribo
Tanto vigor e esforzo non consta na Ghabhala
pero son descendentes de Breoghan e basta…
En Brentracht en Moighi Iotha
nas costas da invernía
desembarcan con xúbilo e moi esperanzados…
Sen recelar un chisco do destino inclemente
que os deuses lles deparan
