Como sociólogo, e a título particular, levo varios meses facendo un estudo sociolóxico sobre a simboloxía franquista que queda por retirar na Coruña, once anos despois da aprobación da Lei da Memoria Histórica, con este resultado:
AÍNDA QUEDAN 106 SÍMBOLOS FRANQUISTAS POR RETIRAR NO CONCELLO DA CORUÑA (74) E NA DEPUTACIÓN (32).
UNHA VERGOÑA! que sitúa á nosa cidade entre as que teñen máis simboloxía franquista.
Este traballo de investigación de 68 páxinas será enviado ao alcalde da Coruña (para o Consello da Memoria Democrática), á Cátedra de Memoria Histórica da Universidade da Coruña e ao Presidente da Deputación e CRMH.
En 2004 presentaba unha iniciativa cívica, baixo o lema “Tolerancia cero co franquismo” que culminaba coa constitución da Comisión pola Recuperación da Memoria Histórica. A día de hoxe, este lema ten plena vixencia.
Se falamos de acabar cos restos do franquismo, de poñer freo á extrema dereita, unha sociedade e unhas institucións democráticas non poden manter 106 símbolos franquistas.
Este informe quere acabar con case dous anos de silencio e coa mensaxe compracente de que “xa acabamos con toda a simboloxía franquista”, que non ten nada que ver coa realidade e, ademais, contribúe á desmobilización da cidadanía.
As organización políticas deberían actuar cun mínimo de coherencia política, cos mesmos criterios en todos os concellos e institucións, e deberían retirar a simboloxía franquista por respecto ás vítimas do franquismo.
Valentín González Formoso non pode retirar, como Alcalde das Pontes no pleno de xaneiro de 2009, as distincións honoríficas a José Antonio Girón de Velasco, falanxista e ministro de Franco, e ao xeneral golpista Constantino Lobo, e manter en 2018, como Presidente da Deputación, a esas dúas persoas coa distinción de Fillo Adoptivo da provincia.
Se a Deputación de Pontevedra aproba por unanimidade no Pleno de 29 de xullo retirar a Calvo Sotelo a distinción de Fillo Predilecto, este golpista non pode conservar sete distincións nos concello da Coruña: avenida Calvo Sotelo, rúa Hogar Calvo Sotelo, peirao Calvo Sotelo, placa no vello cárcere provincial, retrato no Salón Real do palacio municipal de María Pita, Fillo Adoptivo e Fillo Predilecto.
Se o concello de Pontevedra elimina en 2002 a rúa Salvador Moreno Fernández (hoxe Rosalía de Castro), cos votos do BNG e PSOE, este almirante golpista (bombardeou desde o cruceiro Canarias a unha multitude que fuxía pola estrada Málaga-Almería, despois da entrada dos fascistas en Málaga, asasinando a 5.000 persoas) non pode ser Fillo Adoptivo na Deputación da Coruña.
Se o concello de Santiago, no pleno do 19 de xullo de 2018, retira a Laureano López Rodó (votos a favor de PSOE, Compostela Aberta e BNG) as distincións de Alcalde Honorario e Fillo Adoptivo, o concello da Coruña non pode manter a distinción de Fillo Adoptivo a este ministro de Franco…
A continuación tedes os documentos coa relación dos 106 símbolos franquistas que quedan por retirar no concello da Coruña e a Deputación Provincial, e o informe de 68 páxinas que xustifica a proposta de eliminación.
Manuel Monge
A Coruña, decembro de 2018
[toggle title=”INFORME DE SÍMBOLOS FRANQUISTAS POR RETIRAR“]
Informe para o Consello da Memoria Democrática, Cátedra de Memoria Histórica da UDC, Deputación e CRMH. Aínda quedan 106 símbolos franquistas por retirar no Concello da Coruña e na Deputación en aplicación da Lei da Memoria Histórica
[tnc-pdf-viewer-iframe file=”https://www.acalexandreboveda.gal/descargas/memoria/simboloxia-franquista-informe.pdf” width=”650″ height=”800″ download=”true” print=”true” fullscreen=”true” share=”true” zoom=”true” open=”true” pagenav=”true” logo=”true” find=”true” current_view=”true” rotate=”true” handtool=”true” doc_prop=”true” toggle_menu=”true” language=”gl” page=”” default_zoom=”auto” pagemode=””]
[/toggle]
[toggle title=”RELACIÓN DOS 106 SÍMBOLOS FRANQUISTAS POR RETIRAR“]
Simboloxía franquista que queda por retirar. Relación dos 106 símbolos franquistas que quedan por eliminar no concello da Coruña e na Deputación.
[tnc-pdf-viewer-iframe file=”https://www.acalexandreboveda.gal/descargas/memoria/simboloxia-franquista-por-retirar.pdf” width=”650″ height=”800″ download=”true” print=”true” fullscreen=”true” share=”true” zoom=”true” open=”true” pagenav=”true” logo=”true” find=”true” current_view=”true” rotate=”true” handtool=”true” doc_prop=”true” toggle_menu=”true” language=”gl” page=”” default_zoom=”auto” pagemode=””]
[/toggle]